ಅವಸರವಿಲ್ಲ ನನಗೆ

ಅವಸರವಿಲ್ಲ ನನಗೆ
ಮೆಲ್ಲನೆ, ಮೆಲ್ಲ ಮೆಲ್ಲನೆ
ಮೆಲ್ಲುವ ಸವಿ ಉಂಡೆಯಲಿ
ಮೆಲ್ಲನೆ, ನರ ನರಳುವ
ವಿಷವಿಕ್ಕಿ ಕೊಲ್ಲಬಹುದು ನೀನು

ಇರುಳು ಸರಿದು ಹಗಲಾಗಿ
ಹಗಲು, ಕರಿ ಚಾದರ ಹೊದ್ದು ಮಲಗುವ ಮುನ್ನ
ನೀನು-ನಾನು ಒಂದಾಗಬೇಕು, ನಾನು-ನೀನು ಬೇರೆಯಾಗಬೇಕು
ಎಂಬೆಲ್ಲ ಅವಸರವಿಲ್ಲ ನನಗೆ
ಮೆಲ್ಲನೆ... ಮೆಲ್ಲನೆ, ಕ್ಷಣ, ದಿನ, ವರುಷ
ಕಾಯಿಸಿ, ಕಾಯಿಸಿಯೇ ನನ್ನ ಇಲ್ಲವಾಗಿಸಬಹುದು

ಅವಸರವಿಲ್ಲ ನನಗೆ
ಬಿಟ್ಟು ಹೋದ ನಿನ್ನ
ಬಿಡದ ನೆನಪುಗಳ ನನ್ನ
ಆ ಕ್ಷಣವೇ
ಸತ್ತೇ ಬಿಡೋಣ ಅನ್ನಲು
ಸರಿಯಬಹುದು ನೀನು, ಮೆಲ್ಲ...ಮೆಲ್ಲನೆ
ನಿಧಾನವಾಗಿ... ದೂರ... ದೂರ
ನಭದಲಿ ತಾರೆ ಸರಿದಂತೆ, ಮಣ್ಣೊಳಗೆ ಹೆಣ
ಲೀನವಾದಂತೆ

ಅವಸರವಿಲ್ಲ ನನಗೆ
ಒಮ್ಮೆಲೆ ಸತ್ತು ಹೋಗಲು...
ಸಿದ್ದ ನಾ
ಸಾಯಲು, ಬೇಯಲು
ಕಾದು, ಕಾದು, ಮೆಲ್ಲ ಮೆಲ್ಲನೆ
ದಿನ ದಿನ, ಕ್ಷಣ ಕ್ಷಣ ಸಾಯಲು

ಕೊಲಬಹುದು ನೀನು
ನನ್ನ ಕೊಂದೆ ಬಿಡಬಹುದು ನೀನು
ಈಟಿ, ಭರ್ಜಿ, ಚಾಕು, ಚೂರಿ ಹಾಕದೆ
ಗುಂಡು, ಪಾಶನ ಇಕ್ಕದೆ
ಬಲು ಸುಲಭ ನಿನಗೆ,
ಹುಡುಕೊಂದು ನೆವ, ಪ್ರೀತಿ ತುಂಡರಿಸಲು
ನಿಧಾನ ವಿಷವೇರಿ
ಅವಸರವವಿಲ್ಲದೆ ನನ್ನ ಸಾಯಿಸಲು...!