ಬರೇ...

ಬರೇ ಕನಸುಗಳಲ್ಲ ಇವು
ನಾಳೆಯ ಬಾಳಿನ ಭರವಸೆಗಳು
ನೊಂದ ಬೆಂದ ಮನಕ್ಕೆ
ತಂಪನ್ನಿಯುವ ಅಮೃತಬಿಂದುಗಳು

ಬರೇ ಮೌನಗಳಲ್ಲ ಇವು
ಮಾತಿನ ಹಿಂದಿರುವ ಯೋಜನೆಗಳು
ಯಾರೂ ತಿಳಿಯದ, ಇನ್ಯಾರು ಅರಿಯದ
ಅವರ‍್ಯಾರು ಮುರಿಯದ ಆಟಿಕೆಗಳು
ತನಗೂ ಮೆದುಳಿದೆ ಅನ್ನುವ ಸೂಚನೆಗಳು

ಬರೇ ಮಾತುಗಳಲ್ಲ ಇವು,
ಯಾವೊಂದು ಜೀವಿಯಲ್ಲೂ
ಇರದ ಒಳ ಹೊರಗಿನ ಅಭಿವ್ಯಕ್ತಿಗಳು
ನನ್ನ ನಿನ್ನ ನಡುವಿನ ಅತ್ಮಿಯ ಬೆಸುಗೆಗಳು

ಬರೇ ಸ್ನೇಹಗಳಲ್ಲ ಇವು,
ಮನುಕುಲದ ಸುಂದರ ಚಿತ್ರಣಗಳು
ಸೂರ್ಯನ ಬೆಳಕಿನಷ್ಟೆ ಸತ್ಯವಾದ,
ನಿತ್ಯವಾದ, ಹೃದಯಂಗಮವಾದ
ಹೆಣೆಹೆಣೆದು ಬೆಸೆದುಕೊಳ್ಳುವ
ಬಿಗಿ ಬಾಂಧವ್ಯಗಳು.

ಬರೇ ನಂಬಿಕೆಗಳಲ್ಲ ಇವು
ನನ್ನ ನಿನ್ನ ನಡುವೆ ನಡೆಯುವ
ನೂರೊಂದು ವ್ಯವಹಾರಕ್ಕೆ ಸೇತುವೆಗಳು
ಜಗದ ಸಾವು ನೋವುಗಳ
ಮರೆಯಲು, ತೊರೆಯಲು
ಕಾರಣವಾಗೋ ಗಿಡ ಮೂಲಿಕೆಗಳು.